Blog Details

ರಕ್ಕಸ ಮಗುವಿನ ಜನನಕ್ಕೆ ಹೊಸ ತಿರುವು.

ಅಸ್ಸಾಂನಲ್ಲಿ ರಾಕ್ಷಸ ಮಗುವೊಂದು ಜನಿಸಿದೆ. 11 ತಿಂಗಳಿಗೆ ಜನಿಸಿದ ಈ ಮಗು ರಾಕ್ಷಸನಂತಿದ್ದು, ಇದು ತಾಯಿ ಕರಳನ್ನು ತಿಂದು ಆಕೆಯನ್ನು ಸಾಯಿಸಿದೆ. ಅಷ್ಟೇ ಅಲ್ಲ, ಮಗುವನ್ನು ಮುಟ್ಟಿದ ನರ್ಸ್​ ಕೂಡ ಮೃತಪಟ್ಟಿದ್ದಳು, ಎನ್ನುವ ಸುದ್ದಿ ಇತ್ತೀಚೆಗೆ ಭಾರೀ ವೈರಲ್​ ಆಗಿತ್ತು. ಆದರೆ, ಇದರ ಅಸಲಿಯತ್ತು ಮಾತ್ರ ಬೆರೆಯೇ ಇದೆ!

For ENGLISH content CLICK HERE.

‘ರಕ್ಕಸ ಮಾದರಿಯ ಮಗು ಜನನ’ ಎನ್ನುವ ಶೀರ್ಷಿಕೆಯೊಂದಿಗೆ ಇತ್ತೀಚೆಗೆ ಪತ್ರಿಕೆಯೊಂದು ವರದಿ ಮಾಡಿತ್ತು. ಈ ಸುದ್ದಿಯ ಕ್ಲಿಪ್​ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್​ ಆಗಿತ್ತು. ಅಲ್ಲದೆ, ವೈರಲ್​ ಆದ ವಿಡಿಯೋದಲ್ಲಿ ಮಗು ನೆಲದ ಮೇಲೆ ಮಲಗಿ ಅಳುತ್ತಿರುವ ಹಾಗೂ ಅದರ ಮೇಲೆ ನೊಣ ಹಾರುತ್ತಿರುವ ದೃಶ್ಯ ಕಂಡು ಬಂದಿತ್ತು. ಪೇಪರ್​ನಲ್ಲಿ ಪ್ರಕಟವಾದ ಸುದ್ದಿಯಲ್ಲಿ ಈ ಮಗು ತಾಯಿಯನ್ನೇ ಕೊಂದಿದೆ. ನಂತರ ಮಗುವಿಗೆ ಇಂಜೆಕ್ಷನ್​ ನೀಡಿ ಸಾಯಿಸಲಾಗಿತ್ತು ಎನ್ನಲಾಗಿತ್ತು.

ಆದರೆ, ಅಸಲಿ ವಿಚಾರ ಹೀಗಿಲ್ಲ. ಈ ಘಟನೆ ನಡೆದಿದ್ದು ಮೂರು ವರ್ಷಗಳ ಹಿಂದೆ, ಅಂದರೆ 2016ರಲ್ಲಿ. ಮಹಾರಾಷ್ಟ್ರದ ರೈತ ದಂಪತಿಗೆ ಈ ಮಗು ಜನಿಸಿತ್ತು. ಆದರೆ, ಪಾಪ ಈ ಮಗು ತಾಯಿ ನರ್ಸ್​​ನನ್ನು ಕೊಂದಿರಲಿಲ್ಲ. ಪೇಪರ್​ನಲ್ಲಿ ಪ್ರಕಟವಾದಂತೆ ಈ ಮಗು ರಕ್ಕಸ ಮಗು ಆಗಿರಲೇ ಇಲ್ಲ.

ಈ ಮಗು ಹುಟ್ಟುವಾಗಲೇ ಹಾರ್ಲೆಕ್ವಿನ್ ಇಚ್ಥಿಯೋಸಿಸ್ (Harlequin Ichthyosis) ಹೆಸರಿನ ಅಪರೂಪದ ಚರ್ಮ ಕಾಯಿಲೆಯಿಂದ ಬಳಲಿತ್ತು. 10 ಲಕ್ಷ ಮಂದಿಯಲ್ಲಿ ಒಬ್ಬರಿಗೆ ಈ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ. ಮಗುವಿಗೆ ಹುಟ್ಟವಾಗ ಈ ಸಮಸ್ಯೆ ಕಾಣಿಸಿಕೊಂಡಿತ್ತು. ಹೀಗಾಗಿ ಮಗುವಿನ ಚರ್ಮ ಆರೀತಿ ಕಾಣುತ್ತಿತ್ತು. ಎರಡು ದಿನ ಮಾತ್ರ ಬದುಕಿದ್ದ ಮಗು ನಂತರ ಮೃತಪಟ್ಟಿತ್ತು.

ಚರ್ಮ ವಿಚಿತ್ರವಾಗಿ ಕಾಣುವುದೇಕೆ:

ಈ ಕಾಯಿಲೆ ಇದ್ದವರಿಗೆ ಹಳೆಯ ಚರ್ಮದ ಸೆಲ್​ಗಳು ಬೇಗ ನಶಿಸುವುದಿಲ್ಲ. ಈ ವೇಳೆ, ಹೊಸ ಚರ್ಮ ಬೇಗೆ ಉತ್ಪಾದನೆ ಆಗಿ ಬಿಡುತ್ತವೆ. ಇದರಿಂದ ಚರ್ಮ ದಪ್ಪವಾಗಿ ಕಾಣಿಸುತ್ತದೆ. ಇದೇ ರೀತಿ ಈ ಮಗುವಿಗೂ ಆಗಿದೆ. ಹೀಗಾಗಿ ನೋಡಲು ವಿಚಿತ್ರವಾಗಿ ಕಾಣಿಸಿದೆ.

ಕಾಯಿಲೆಗೆ ಮದ್ದಿಲ್ಲ:

ಈ ಕಾಯಿಲೆ ಕಾಣಿಸಿಕೊಂಡರೆ ಅದಕ್ಕೆ ಮದ್ದಿಲ್ಲ. ಆದರೆ, ಬದುಕುವ ಸಾಧ್ಯತೆ ಇದೆಯಂತೆ. ಅಮೆರಿಕದ 23 ವರ್ಷದ ಯುವತಿಗೆ ಹುಟ್ಟುವಾಗಲೇ ಈ ಸಮಸ್ಯೆ ಕಾಣಿಸಿಕೊಂಡಿತ್ತು. ಆದಾಗ್ಯೂ ಈಕೆ ಬದುಕಿದ್ದಾಳೆ. ಈ ಕಾಯಿಲೆಯಿಂದ ಬಳಲುತ್ತಿರುವ ಅತಿ ಹಿರಿಯೆ ಈಕೆ.

Alt News ಮತ್ತು News 18 ಸೇರಿದಂತೆ ಹಲವಾರು ಸುದ್ದಿ ಮಾಧ್ಯಮಗಳು ಅಸಲಿಯತ್ತನ್ನು ವರದಿ ಮಾಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದ ವದಂತಿಗಳಿಗೆ ತೆರೆ ಎಳೆದಂತಾಗಿದೆ.